ლექსიკური ერთეულის Smart ევოლუცია ინგლისურ ენაში: მტკივნეულიდან ჭკვიანამდე

ანოტაცია

ლექსიკური ერთეულის "smart" ევოლუცია ინგლისურ ენაში ასახავს მის გამორჩეულ განვითარებას თავდაპირველი მნიშვნელობიდან — „მტკივნეული“ — მის თანამედროვე მნიშვნელობამდე, რომელიც გულისხმობს ინტელექტსა და დახვეწილობას. ეს სტატია იკვლევს, თუ როგორ ხდება სემანტიკური ცვლილებები ენაში, აკვირდება სიტყვის „smart“ ტრანსფორმაციას მეტაფორული გაფართოებისა და კულტურული ცვლილებების გზით. ძველ ინგლისურში მისი მნიშვნელობა, ფიზიკურ ტკივილს აღნიშნავს, თუმცა დროთა განმვალობაში სიტყვის მნიშვნელობა ფართოვდება და უკვე შუა ინგლისურში ფსიქიკური და ემოციური ტანჯვის მნიშვნელობას იძენს. 

დროთა განმავლობაში, ფიზიკურ ტკივილსა და ინტელექტუალურ გამჭრიახობას შორის მეტაფორული კავშირი დამყარდა, რამაც გამოიწვია მისი ასოცირება გონებრივ სიმახვილესა და საზრიანობასთან. კულტურულმა ცვლილებებმა, რომლებიც ინტელექტუალურ უნარებს უსვამდა ხაზს, კიდევ უფრო გაამყარა ეს გარდაქმნა, რამაც საბოლოოდ მისი თანამედროვე მნიშვნელობით გამოყენება განაპირობა, რომელიც დღეს აღნიშნავს ინტელექტსა და საზრიანობას. ამავდროულად, სტატია იკვლევს ლექსიკური ერთეულის "smart" ინტეგრაციას ტექნოლოგიასთან დაკავშირებულ ტერმინებთან, როგორიცაა, „smartphone“, რაც ასახავს მის მუდმივ აქტუალობას და ადაპტირებას თანამედროვეობასთან. ლინგვისტური ანალიზის საშუალებით, ნაშრომი ხაზს უსვამს, ფაქტს თუ, როგორ ვითარდება ენა სოციალური, კულტურული და ტექნოლოგიური ცვლილებების საპასუხოდ, წარმოაჩენს ენის დინამიურ ბუნებას და მის ღრმა გავლენას ადამიანის განვითარებაზე.